Blog About Jordan : بالعربي

 

متعب: ااا يا ابو وراد طمننا, وراد نجح؟

ابو وراد: اه والله نجح

متعب: والله يا ريته الف مبروك, زغرتي (بكسر الغين) يا ام طراد! شو قديش جاب؟

ابو وراد: 55, ظربوهم عمي, هالمسكين وراد مقضيها سهران بهالصالون لوجه الصبح يدرس, بس بقوللي الاسئلة مش من المنهاج كلها! تعجيزية

 في هذه الاثناء, وراد بالصالون سهران عالتلفون مع خسة الحارة بعد ما زين عملوا خدمة سهر – بتدفع ليرتين كل شهر و من نص الليل للستة الصبح بتحكي ببلاش على رقم-.

 متعب: يا زلمة ما هو وزير ال…. ابن …..

ابو وراد: الله يفظح……

ام وراد: الله لا يوفئهم الهي, معلش يا حبيبي يا ماما, شو كيف علامات الصف؟

وراد: زفت يما, اللي كانوا متوقعينه الاول جايب 54,9 اقل مني

 ابو وراد: يا زلمة قسما بالله تفرجت على اسئلة الرياظيات ما عرفت احل اشي! (مؤهلات الاب العلمية: صف تالت + دورة خط سوالف). يا زلمة تصدق و تامن بالله

 متعب: لا اله الا الله

 ابو وراد: جايبينلهم كل الامتحان عالتفظل

 وراد: يابا التفاظل و التكامل

 ابو وراد: خذلك! و الله اسمه مش عارف احفظه

 متعب: لا اله الا الله, ما بقدر الواحد يقول غير حسبي الله و نعم الوكيل, عند الله ما بروح اشي

 ابو وراد: حسبي الله و نعم الوكيل بس يا رجل فلتة رياضيات, تع ولا سمع لعمك جدول الظرب

 وراد: مرحبا عمي

متعب: هلا بالامير

(وراد بسمع جدول الضرب من 1-3)

(ابو وراد بستلم التلفون: مش قلتلك؟؟

متعب: ما شاء الله يا زلمة ….. هالبلد على ….. ال …………! و بقولولك ليش الشباب همل دايرين بالشوارع!

  و احنا جماعة التمانينات و التسعينات كلنا قرابة الوزير! للعلم بس, التوجيهي منهاجا اسهل من صف 11 و الاسئلة تلات ارباعها سهل للي عنده فكرة عن المادة و الربع الاخير متوسط لغربلة مستويات الطلاب, بس و لا حدا بهالبلد عاجبه اشي فيها, ما هو لما قرؤوا عنها في بروشور مكتب السياحة و قرروا ييجوا يستقروا فيها اوهموهم اننا بلد نفطي و عنا سبع انهار و الزراعة عنا مكسرة الدنيا. يعني ماوكلي اخدوه القرود و الحيوانات, ما طعموه كافيار و لا سهروه بإيت بس لما لقى امه ما سب عليهم, و الله انك اصيل يا ماوكلي! ولاد الاصول اللي بعرفوا انه اللي بياكل من ايد ما بعضها.

 

Wikipedia:

Jordan has given great attention to education in particular. Its educational system is of international standards and its secondary education program is accepted in world-class universities. It is ranked 77^th in the world according to literacy rate, and the first in the Arab world.

كله بحكي سياسة, ابن الخمس سنين بحقظ حكي الماما و الجارات في قعدة مطلقات و بروح بسمع لاصحابه.

اذا كان اردني من اصل اردني:

اجيتونا حافيين, عيشناكم, نصبتوا علينا و ملينتوا, ملوخياتكم و عالجسر, و الفيصلي الزعيم

اذا كان اردني من اصل فلسطيني:

يا بدو يا معفنين اجينا بنينالكم هالصحرا و عملنا منكم بشر و الا كنتوا لهلأ دايرين ورا غنمكم, و الوحدات بطل الدوري

 انا مش ضد انتقاد الاردن و ما فش اشي بكرهه اكتر من هز الدنب, لكن للنقد اصول. اذا باصم حكي الماما و البابا او اصحاب الماما و البابا المحنكين سياسيا اللي الواحد فيهم لما يفلوز بفكر حاله محسود فيفضل انك تلحنها و تعمللها رقصة. اذا بدك تفرجي الناس انك محنك سياسيا و انسان مضطلع و مفكر فما الك غير تعمل بلوج, الك جمهور واسع, اذا كنت بتنتقد عشان تعمل حالك مواطن نزيه و مش هزيز دنب فما الك غير الاخوان المسلمين, اذا كنت بتنتقد عشانك فاضي اشغال و مش طايق البلد و اللي فيها عشان صاحبتك تركتك و ابوك هددك يكحشك من الدار اذا ما بتلاقي شغل فما الك غير التشات رومز, روح على اقرب انترنت كافيه و خش على تشات روم و ما تتفرج وراك, البنات على قفا مين يشيل. اما اذا كنت بتنتقد عشان قلبك عالبلد و حابب تشوفها احسن عشانك و عشان اولادك و اولاد اولادك فما تشكي لاصحابك وصل رأيك لحد مسؤول, فش بيت اردني ما فيه ارقام شكاوي كل دائرة حكومية و اذا طلعلك واحد عايف التنكة و حلقلك فكل كبير في اكبر منه و اذا ما اجا بالمنيح بيجي بغيره. الاردن مش اسم تجاري, الاردن وطننا و هويتنا, احنا الاردن.